Académie des parents

« Académie des Parents » se enn kontinwite lozik dan nou laksion pou inplik bann paran davantaz dan lankadreman zot bann zanfan. Se enn laksion ki’nn koumanse depi 1999 a traver proze « Ecole des Parents »
Lansman « Académie des Parents » inn fer le 03 Ziye 2016. « Académie des Parents » se enn dinamik kominoter ki ena kouma obzektif pou ed, ankadre, sansibiliz ek form bann paran pou ki dan zot milie familial zot pli kapav soutenir zot bann zanfan dan zot ledikasion ek asir zot proteksion ek devlopman, amelior kominikasion ki zot ena ant zot ek montre plis konsiderasion ki zot ena pou zot pou ki dime zot kapav vinn bann adilt exanpler.

Bann obzektif sa proze-la:
1. Inkilke a bann paran bann eleman fondamantal lor bann bezwin, psikolozi ek bann drwa zot bann zanfan ek devlop zot konpetans edikatif
2. Alez langwas kotidien bann paran dan zot lavi familial a traver enn meyer konpreansion konportman zot bann zanfan
3. Devlop lestim personel bann paran ek ed zot gagn ankor plis konfians an zot ek donn zot bann zouti pratik, efikas ek presie pou edik ek resposabiliz zot bann zanfan
4. Permet bann paran reflesi ansam ek pran konsians zot bann resours, gagn lakse ar bann informasion fiab ki bien souvan inaksesib pou zot.
5. Permet bann paran pran rekil par rapor a seki zot viv ek gagn enn meyer vizion lor rol enn paran.

Bann benefisier sa proze-la se bann paran bann zelev enn douzenn lekol maternel dan Roche-Bois ek bann landrwa avwazinan ek ousi bann paran bann benefisier dan nou program akonpagnman pou bann zelev primer.